Giswiler Fasnachtsplekettä

Fasnachtseröffnung  2026

Miär hend das Jahr  keini Familiwappä uf dr Plakettä. Hiir  hemmer einisch ganz anders uberleid. Miär hend dänkt, was bruicht äs alles, dass dä Fasnachtsumzug und alles drum umä diod funktioniärä. Da hemmer nuh glih gmerkt, dass äs vill Lyt bruicht, wo das ganzi am Loifä bhaltid.

Agfangä bim Verkehr wo am Fasnachtssunntig alles anderi as normal isch. Dass äs trotzdäm funktioniärd und keini grösseri Störigä gid, da mios eper dr hinder gah, das Ganzi uberdänkä und dr nah oi organisiärä. Oi d’Sicherheit am Umzug, fürä Fall das eppis chennt passiärä, dass isch nid eifach zum planä. Wenn aber de ä Situation isch mios epper chennä reagiärä. Dr Umzug isch oi trotz dä vilä Jahrä wos näh gid, kei Sälbstloifer und mios immer gstiired wärdä.

Wiäs oi alli Jahr immer wider z’gseh isch, gids nachem Umzug fri ä chli Gisel und Grümpel wo eifach so umä liid. Dass isch nids verhinderä und mios mäh i choif näh. Siigis wildi Gruppä wo ihri Getränk a Zioschoiwer verschänkid und Bächer dr nah umäligid, oder ä Wagäbuigruppä wo nuh mios ihrä Grümpel uf Strass beförderä. All das gherd halt midem Lärmä oi nuh zum Giswiler Fasnachtsumzug. Dä Umzug isch wiit umä bekannt und wird für sii spezielli anderi Art gliäbt.

Liäbi Fasnächtler iär wissid jetz sicher wer uf der hiirigä Plakettä druif isch. Ich wett jetz ganz härzlich Dankä sägä, a dänä zweh tollä Truppä wo all diä Arbet woni jetz gseid ha, diänd erledigä. Drum isches sicher, dass siis meh as verdiäned hend uf dr Plakettä z’sih.

Druif sind:

Fiirwehr Gmeind Giswil verträttä durä Rolf Berchtold und

Ussädiänscht Gmeind Giswil verträttä durä Rico Wenger

Dankä vill mal und ä scheeni unfallfriji Fasnacht mid vill Spass.